23rd IUHPE World Conference on Health Promotion, 7 - 11 April 2019, Rotorua, Aotearoa New Zealand

He Aha Ngā Take Me Tae Ā-Tinana Mai Koe?

Kotahi te Iwi, Kotahi te Hauora, Kotahi te Ao
Ko tō tātou ao he papakāinga kotahi. Ko tāua ōna kirirau.
Ka mahi ngātahi tāua kia piki ai te hauora, kia pai ai te papakāinga.

Nau mai. Ko te Hui ā-Ao 23 o IUHPE mō te Hāpai Hauora he wheako tūhāhā ko tōna rite kāore i kitea, kāore i rangona i tētahi atu hui. Anei ngā take e rima kia tae ā-tinana mai:

1. He Whakapai Ake i te Haoura me te Whai Oranga Whānui o Ngā Tāngata Katoa: He tino huarahi tēnei hui ā-toru tau ki te whakaatu i te pānga o te hāpai hauora ki te whakatutukitanga o ngā whāinga Sustainable Development Goals (SDGs). Ka wānanga hokitia te hāpai hauora hei kaupapa e tinana ai te wawata mō te ao e whai ai ngā tāngata katoa i te hauora me te oranga pai rawa atu.

Ko te pōtae kaupapa o te hui ko tētahi o ngā tino wero o te hāpai hauora: me pēhea te whai whanaketanga o te ao hurihuri me te tiaki i a Papatūānuku e noho ngātahi ai. I runga i ngā māharahara e pā ana ki ngā panonitanga huarere, me te whakahau a te UN ki te aro atu ki ngā SDG, he mea nui te matapaki i ēnei kaupapa taumaha.

2. He Tirohanga Tūhāhā ki ngā Wero Hauora o te Ao: He nui te mātauranga i kōhia mai e Aotearoa me ngā Moutere o Te Moana-nui-a-Kiwa. Ko aua akoranga he hua nō tā mātou aronga tahi ki ngā pānga ki te hauora i konei. I tēnei wāhanga o te Moana-nui-a-Kiwa, te moana nui rawa o te ao, kua aro a Aotearoa ki ētahi o ngā tino wero e pā ana ki te hauora o te ao, ki te whanaketanga tūturu hoki.

Ko te waiaro me ngā rautaki a te Māori e tautoko nei i te hāpai hauora, he mea whai hua, he mea whakamiharo. Kei roto i ā rātou mahi tetahi wāhanga whakaora i te tangata, ko tētahi wāhanga he tautoko i te whakapakari o te akoranga hāpai hauora tonu.

E hiahia ana te kāhui hāpai hauora o Aotearoa me Te Moana-nui-a-Kiwa ki te whakawhitiwhiti whakaaro, whakawhitiwhiti mātauranga. He wheako ā mātou hei tuari ki te hui. Kei reira pea hei āwhina mā tēnā hapori, mā tēnā hapori huri noa i te ao.

3. He Whakakiko i te Kōrero: Kua tohua a Rotorua hei kāinga mō tēnei Hui ā-Ao 23 o IUHPE mō te Hāpai Hauora nā runga i te hōhonu o te ahurea tuku iho. Ka whakatauiratia i Rotorua nei ngā mahi whakawhanake i ngā kaupapa pāpori, ohanga hoki e arotahi ai ki te mahi e tiaki ai i te hauora whānui tonu o te hapori, ki te poipoi i te taiao, i a Papatūānuku.

Hei tāpiri atu, kei Rotorua tonu ngā takaro a-waho hei whakaheke werawera, he mahi kē atu mā ngā māngai ka tae mai ki te Hui. Kei kōnei ngā pāka ataahua, ngā ara hikoi e honohono ana i ngā whare o te kaupapa nei. Kei wareware – ka taea hoki te Tai Chi, ngā hākinakina ngāwari ki te tinana, ngā whakaaturanga whutuporo pā me ngā mahi e whai whakaaro ai te hinengaro arā noa ake, arā noa ake.

Ka āhei hoki te hunga ka tae a-tinana mai ki te whai wāhi ki ngā āhuatanga o te ao Māori pēnei i te kapa haka, te raranga, te waiata me ngā mahi hākinakina o ōnamata.

4. Hangaia Tētahi Kaupapa mā ngā Mokopuna: Ahakoa ko te whakawhitiwhiti whakaaro me te whai hononga te whāinga matua, he whāinga whakahirahira anō ko te whakapūmau i a Rotorua ki ngā āhuatanga e piki mārika ai te ora o ngā tāngata o te tāone nei.

Mā tō taenga mai ki tēnei hui, ka āwhina koe i te tāone o Rotorua i ōna iwi hoki kia whanake, kia kōhure ai ngā wawata ki te taha hauora.

5. Nau mai ki Aotearoa: He taiao whakakōrekoreko i te tangata, he wheako whakamiharo. Me haere mai ki Aotearoa ka tika! He wā i mua tonu mai, i muri tonu mai rānei i te hui ki te torotoro atu i ngā wāhi huhua o tēnei whenua kia rongo i te manaakitanga e rongonui nei te iwi o Aotearoa whānui tonu.

He ngāwari noa iho te tae mai ki Aotearoa. Neke atu i te 330 ngā rerenga mai i tāwāhi i ia wiki, i ia wiki. Mō ētahi whenua (āhua 50) hei aha noa iho te pane uruwhenua mō ngā hararei poto. Mō te hunga haere mai, ka whakahekehia e Star Alliance (tētahi o ngā hoa whakahaere) te utu o te tikiti rererangi, nā whai anō kia kakama te tuku i tō ingoa ki te rārangi īmērā kia ako koe me pēhea te hoko tikiti e ngāwari ana te utu, kia tino whai hua ai tō haere mai ki Aotearoa.