23rd IUHPE World Conference on Health Promotion, 7 - 11 April 2019, Rotorua, Aotearoa New Zealand

Ngā Tāngata Whenua

E hīkaka ana a Te Arawa Lakes Trust i te whakatūnga o te Hui ā-Ao 23 mō te Hāpai Hauora o IUHPE (International Union for Health Promotion and Education) ki tōna rohe pōtae.

Nā taku tūnga hei Tiamana o Te Arawa Lakes Trust, kua tohua au hei māngai mō ngā iwi whānui o Te Arawa. Kua mārama katoa mātou ki ngā hua wā roa o tētahi hui ā-ao e pēnei nā mō te kaupapa hāpai i te hauora. Tēnei te ringa pōhiri o tō mātou tupuna a Kahumatamomoe me tō mātou maunga rangatira a Ngongotahā e toro atu nei ki a koutou ngā manuhiri tūārangi nō ngā tōpitopito maha o te ao. Tekau mā whā ngā roto o tēnei takiwā kua tohua hei taonga o te motu, heoi anō mā te rerehua o Te Rotorua Nui a Kahumatamomoe e whakaū te wairua hīkaka ki te hinengaro, ki te ngākau o tēnā o tēnā o ō mātou manuhiri.

Ko tētahi o ngā tino hua ka puta i tēnei hui ko te titiro hōmiromiro ki ngā mahi e kōkiritia ana ki te whakapiki i ngā tatauranga hauora o te iwi Maori. Kei te mōhio mātou ki ngā mahi e whakatutukihia ana e te Health Promotion Forum (HPF) ki te tautoko i ā mātou mahi hei hapai i te hauora o te iwi Māori, i ngā mahi huri noa i te ao hoki. Kei Rotorua nei, heoi anō kei te rohe whānui, kitea ai te kanohi Māori i ngā kaupapa katoa - ko te hauora tērā, me ētahi anō kaupapa tae atu ki te whakapakari ohanga, ahurea, whakahīato ora, mātauranga hoki.

Hei kupu whakamutunga māku, he kaha hiahia nō mātou ki te whakaatuatu ki te ao i ngā āhuatanga maha o Rotorua, ko tōna iwi tērā, ko tōna taiao tērā. Ka pērātia e mātou i raro i te korowai o tēnei hui hauora ā-ao; nō mātou te honore ki te tautoko i te Health Promotion Forum kia tutuki pai ai.

Nāku noa, nā

Dr Sir Noble (Toby) Curtis PhD KNZM
Te Arawa
Tiamana
Te Arawa Lakes Trust