23rd IUHPE World Conference on Health Promotion, 7 - 11 April 2019, Rotorua, Aotearoa New Zealand

Kaupapa matua o IUHPE 2019

WAIORA: Te Hāpai Hauora ā-Ao me te Whanaketanga Tūturu mō te Katoa

He harikoa te Health Promotion Forum o Aotearoa, te International Union for Health Promotion and Education (IUHPE) me ngā kaitautoko, ki te whakahaere i tēnei takunetanga hauora ā-ao whakahirahira, i Rotorua, Aotearoa ā te Paengawhāwhā 2019. Ko te whāinga, he kimi hononga me te whakaatu i te painga o te hāpai hauora mō ngā Whāinga Whanaketanga Tūturu (SDGs) ka tahi, me te whakaatu i ngā mahi a ngā SDGs hei whakapai ake i te hauora me te whai oranga whānui.

Ko te hāpai i te hauora ā-ao he wero nui mō ngā kaihāpai hauora o te ao whānui. Kua ngaringari ake te taunakitanga e pā ana ki te ariā o te wā mō te whanaketanga ohaoha, pāpori hoki e kī nei me whakapau i ngā rauemi o te ao tūroa, ka mutu ko te tauritenga kore i roto i ngā whenua, i waenganui i ngā whenua, i ngā whakatipuranga tangata katoa. Ka aro ki te hauora ā-ao, ko te hua ko te whakawhānui i te aronga ki te hauora o te marea, ka mutu ka whai pānga ki ngā āhuatanga haupori, pāpori hoki o te hauora he whāinga hei aronga mā te marea. Kei roto i te kupu Waiora te māramatanga o ngā whakaaro o te iwi taketake o Aotearoa ki tēnei mea he hauora me te whanaketanga tūturu. Ko te Waiora he wai parakore, he wai whai oranga. He karanga tēnei ki te tuari mātauranga o ngā pūnaha ahurea huhua kia ora ai te ao me te tangata. Mā te whanaketanga tūturu mō te katoa e tōtika ai te hauora o te ao mō ngā whakatipuranga e heke tonu mai.

Ko tā ngā SDG 17 o te Kotahitanga o Ngā Iwi o te Ao, he hanga i te anga mārama, pū hāngai, kaha hoki, hei whakakotahi i te hāpai hauora, te whanaketanga tūturu, me te tauritenga. Ahakoa kotahi noa iho te SDG e kōrero motuhake ana mō te hauora, ko te hāpai oranga whānui he kaupapa o ngā whāinga katoa. E whā ngā wāhanga kōkiri e whakaarohia ana: ko te oranga whānui me te hauora; ko te anga me ngā tino taumahi hei whakaoti i ngā whāinga oranga whānui; ko te ao tūroa e taea ai te anga rāroto; ko te ārahitanga me ngā whanaungatanga e hiahiatia ana ki te whakaea i ēnei whāinga katoa.

Ko ngā huihuinga ā-ao o IUHPE he hui whakahirahira e whakatōpū ai ngā pononga o tēnei kaupapa te hāpai hauora nō ngā hau e whā. Ki ngā waeawae tapu, ki ngā ika a Whiro hoki, ko tā ēnei hui i ia toru tau he tautuhi i te “tihi o te maunga” o ngā mahi hāpai hauora, o te rangahau, o te ariā. Mō ngā tau 30 kua hipa ake, i runga i ngā akoranga o te Ottawa Charter, kua hangaia e te kaupapa hāpai hauora tētahi mātauranga hōhonu, whai pānga, me ētahi rautaki pai ki te whakaea i ngā āhuatanga hauora huhua. I runga i te mātauranga me ngā wheako i whakaemihia i ēnei tekautau, kei te rere te karanga o te Hui ā-Ao o IUHPE mō te Hāpai Hauora ki te kāhui whakapiki hauora (kairangahau, tākuta, kaiwhakahaere hoki) me ō rātou hoa rangatira nō ngā rāngai katoa e hāngai ana, ki te kai i te hakari take hauora o te ao, ki te tūhura hoki i ngā huarahi hei whai mā te hāpai hauora:

  • Kia ū ai te tauritenga hauora o te tangata i te whenua ake, i waenganui i ngā whenua maha, mā reira e pakari ai te tangata hei ākonga mutunga kore
  • Kia haumaru, kia kaha, kia tūturu, ngā wāhi noho katoa o ngā tāone, o wāhi kē hoki; mā reira e tika ai te hauora me te oranga whānui
  • Kia hoahoatia, kia whakatutukihia ngā rautaki panoni huarere e whai take ana, e tōkeke ana
  • Kia kaha, kia tōkeke, kia tōtika te kāwanatanga o ngā taumata katoa; ko tāna mahi he hāpai i te maungārongo, i te tika, i ngā motika o te tangata
Mō ētahi anō mōhiohio me whakapā mai.